ლექცია-სემინარები

ქართული ვაზის ჯიშები – მოძიება, დაცვა და შესწავლა

31 იანვარს საქართველოს გეოგრაფიული საზოგადოების დარბაზში მებაღეობის, მევენახეობისა და მეღვინეობის ინსტიტუტის ვაზისა და ხეხილის გენოფონდის კვლევისა და გენეტიკა-სელექციის განყოფილების ხელმძღვანელმა, დათო მაღრაძემ სპეციალურად ღვინის კლუბისთვის წარმოადგინა მოხსენება: „ქართული ვაზის ჯიშები – მოძიება, დაცვა და შესწავლა“.

განვაგრძოთ კითხვა »

ქართული (კახური) ღვინო, როგორც ფუნქციური საკვები

13 დეკემბერს საქართველოს გეოგრაფიული საზოგადოების დარბაზში ღვინის კლუბის ლექცია-სემინარების ციკლი ბიოლოგიურ მეცნიერებათა დოქტორმა, პროფესორმა არმაზ შალაშვილმა გააგრძელა. მისი ლექცია – “ქართული (კახური) ღვინო, როგორც ფუნქციური საკვები” ეხებოდა ტრადიციული კახური ტექნოლოგიით ქვევრში დაყენებული ღვინოების უნიკალურ თვისებებს.
არმაზ შალაშვილის მეცნიერული კვლევები მოიცავს როგორც ქართული, ისე უცხოური ვაზის ჯიშების ყურძნისგან დაყენებულ ღვინოებში სასარგებლო ნივთიერებების მოცულობის განსაზღვრას და მათ გავლენას ადამიანის ორგანიზმზე.
არმაზ შალაშვილის მიერ წარმოებული ლაბორატორიული კვლევების შედეგად დადგინდა, რომ კახური ტექნოლოგიით ანუ სრულ ჭაჭაზე გაზაფხულამდე დაყოვნებით დადუღებული ღვინოები უფრო მეტ სასარგებლო ნივთიერებებს შეიცავს, ვიდრე ე. წ. ევროპული ტიპის ღვინოები.
მაგალითად, კახური ტექნოლოგიით დაყენებულ “რქაწითელში” ფენოლების ჯამი შეადგენს 2200 მგ/ლ-ს, კატეხინები – 640 მგ/ლ-ს, პროანტოციანიდინები – 690 მგ/ლ-ს. ევროპული წესით დაყენებულ “რქაწითელში” კი საერთო ფენოლების რაოდენობა თითქმის 8-ჯერ ნაკლებია – 280 მგ/ლ, კატეხინები – 9-ჯერ ნაკლები (52 მგ/ლ), პროანტოციანიდინები – 5,5-ჯერ ნაკლები (130 მგ/ლ). სასარგებლო ნივთიერებები განსაკუთრებით დიდი რაოდენობით გვხვდება რქაწითელში, საფერავსა და ქისში.
არმაზ შალაშვილის თქმით, კახური ღვინო მდიდარია ტანინებით, რომლის სარგებლიანობის შესახებ ბოლო ათწლეულებში ბევრი გამოკვლევა გამოქვეყნდა. შესაბამისად, სასურველია, ღვინომ კუთვნილი ადგილი დაიკავოს კვების რაციონში. დღეში თითო ჭიქა წითელი ღვინო სასარგებლოა ჯანმრთელობისთვის, განსაკუთრებით მაშინ, თუკი იგი კახური ტექნოლოგიით არის დაყენებული. ამგვარი ღვინოთერაპიით შეგიძლიათ ებრძოლოთ გულსისხლძარღვთა დაავადებებს. წითელი ღვინო სისხლში ასევე ამცირებს თავისუფალი რადიკალების წარმოქმნას და შესაბამისად, ამცირებს სიმსივნური დაავადებების რისკს.
“ამერიკელი მეცნიერების დასკვნებით, წითელი ღვინო განსაკუთრებით მკერდისა და პროსტატის კიბოს რისკებს ამცირებს. ზოგადად კი, თუ გვინდა, ღვინო გამოვიყენოთ როგორც ორგანიზისთვის სასარგებლო პროდუქტი, მეღვინეებს უნდა მივცეთ რეკომენდაცია, რომ იგი კახური წესით დააყენონ, რათა სასარგებლო ნივთიერებების კონცენტრაცია მასში მეტი იყოს”, – აღნიშნა არმაზ შალაშვილმა და დასძინა, რომ სასარგებლო ზემოქმედება ღვინოს მხოლოდ იმ შემთხვევაში აქვს, თუ მას ზომიერად მოვიხმართ.

ცოტა რამ ქართული ქვევრის შესახებ

ღვინის კლუბი საქართველოს გეოგრაფიული საზოგადოების სხდომათა დარბაზში აგრძელებს ლექცია–სემინარების ციკლს ღვინისა და კულინარიის თემაზე.  22 ნოემბერს გიორგი ბარისაშვილმა წაიკითხა მოხსენება „ცოტა  რამ ქართული ქვევრის შესახებ“, რომელიც მოიცავდა საკმაოდ ვრცელ ინფორმაციას ქვევრის შესახებ – უძველესი ისტორიული ცნობებით დაწყებული, დღევანდელი პრობლემატიკით დამთავრებული.

გიორგი ბარისაშვილის თქმით, უკვე სადავო აღარ არის, რომ საქართველოს ტერიტორიაზე აღმოჩენილი უძველესი ქვევრის ნიმუშები საღვინე ჭურჭლად გამოიყენებოდა. ამას ადასტურებს ქვევრებში აღმოჩენილი ღვინის მჟავა, რომელიც იქ მხოლოდ ღვინის ხანგრძლივი შეხების შედეგად შეიძლებოდა დარჩენილიყო.

გიორგი ბარისაშვილმა ისაუბრა ციხიაგორაზე, ბაგინეთსა და სხვა ადგილებში შემორჩენილ უძველეს მარნებზე, სადაც ჩვენს წელთაღრიცხვამდე ჩაფლული ქვევრები ზოგჯერ დაუზიანებლადაც კი არის შემონახული. ისტორიულ მარნებში ხშირად მხოლოდ ქვევრებია წარმოდგენილი, რაც იმას ნიშნავს, რომ ქართული მარნის უმთავრესი ატრიბუტი ქვევრია. ისტორიულ–არქიტექტურული თვალსაზრისით, ასევე საინტერესოა ე. წ. კოშკმარნები – ერთდროულად ღვინის საცავისა და თავდაცვითი ფუნქციის მქონე ნაგებობები.

ქართული მარანი და მისი მოწყობა, ქვევრის დამუშავება ცვილით, ქვევრის დამზადება – ამ თემებზე გიორგი ბარისაშვილმა დამსწრე საზოგადოების უამრავ კითხვას უპასუხა. დასასრულს მან განაცხადა, რომ მზადა აქვს მოხსენება ქართულ საღვინე ჭურჭელზე, რომელსაც ღვინის კლუბში მომავალი წლის დასაწყისში წარმოადგენს.

© ღვინის კლუბი/vinoge.com

ლექცია სემინარი ქართული ღვინის მარკეტინგის შესახებ

ღვინის კლუბში ტრადიციული ლექცია–სემინარები გრძელდება. 1 ნოემბერს საქართველოს გეოგრაფიული საზოგადოების დარბაზში მარკეტოლოგმა ნიკო თევდორაშვილმა წაიკითხა მოხსენება: „ქართული ღვინის მარკეტინგი დღეს – შეცდომები და შესაძლებლობები“.
ნიკო თევდორაშვილის შეფასებით, ქართული ღვინის ბაზარი ვითარდება, გაყიდული ღვინის რაოდენობა იზრდება, მაგრამ ღვინის პროფესიონალური მარკეტინგი მაინც არ არსებობს.
მარკეტოლოგის ზოგიერთმა მოსაზრებამ და რეკომენდაციამ კლუბში დისკუსია გამოიწვია. მომხსენებელს განსაკუთრებით ღვინის მწარმოებლები არ ეთანხმებოდნენ. მაგალითად, „მეღვინეობა ხარებას“ წარმომადგენელს გაუკვირდა, როდესაც ნიკო თევდორაშვილმა განაცხადა, რომ ღვინის კომპანიების დიდი ნაწილი ბოთლში ჩამოსხმულ 16–ლარიან ღვინოს ჩამოსასხმელი სახით 2 ლარად ყიდის, რაც ფაქტობრივად მომხმარებლის მოტყუებაა.
ასევე დისკუსია მოჰყვა მომხსენებლის შეფასებას, რომ საქართველოს ღვინის ბაზარზე ჯერ კიდევ არ არსებობს ბრენდები, თუკი ბრენდად განვიხილავთ „საქვეყნოდ აღიარებულ“ სავაჭრო ნიშანს, რომელსაც მწარმოებლისთვის მაღალი დამატებითი ღირებულება მოაქვს.
„როგორც ბუნებაში შეუძლებელია იპოვო ორი აბსოლუტურად  ერთნაირი მცენარე, ასევე მარკეტინგში  წარმოუდგენელია უნივერსალური პასუხი, პოზიციონირების რომელი კონცეფცია მუშაობს უკეთესად. ყველაფერი დამოკიდებულია კონკრეტულ პირობებზე და კონკრეტულ სპეციალისტებზე. მოსალოდნელ მარკეტინგულ ბრძოლებში მთავარი იარაღი იქნება ბრენდინგი – ის, რაც ჩვენს ღვინის ბაზარზე ჯერ არ არის. კომპანიებს, რომლებსაც უნდათ უზრუნველყონ მშვიდი და წარმატებული მომავალი, აუცილებლად უნდა გასწიონ დიდი ძალისხმევა და გამონახონ საშუალებები თავიანთი სავაჭრო მარკის შემუშავებისათვის და მისი წარმატებისათვის“, – აღნიშნა ნიკო თევდორაშვილმა.
საუბარი ასევე შეეხო ქართული ღვინის საექსპორტო სტრატეგიის პრობლემებს. ნიკო თევდორაშვილი იზიარებს მოსაზრებას, რომ ქართული ღვინო ვერ გაუწევს კონკურენციას ჩილეს, არგენტინის, ავსტრალიისა და სხვა ე. წ. ახალი სამყაროს იაფფასიან ღვინოებს. ამიტომ ქართულმა ღვინოებმა მსოფლიო ბაზარზე ადგილი საშუალო საფასო სეგმენტისა და პრემიუმ კლასის ღვინოებს შორის უნდა დაიკავოს.
© ღვინის კლუბი/vinoge.com

აკადემიკოს ნოდარ ჩხარტიშვილის მოხსენება ღვინის კლუბში

obchis_tsiteli.jpg

 

ღვინის კლუბმა ლექცია-სემინარების ციკლი განაახლა მევენახეობა-მეღვინეობის აქტუალურ თემებზე. 18 ოქტომბერს, საქართველოს გეოგრაფიული საზოგადოების სხდომათა დარბაზში, ღვინის კლუბის წევრებს და სტუმრებს ცნობილმა ამპელოგრაფმა, აკადემიკოსმა ნოდარ ჩხარტიშვილმა წაუკითხა მოხსენება: ,,ქართული ვაზის უნიკალური ჯიშების პერსპექტივები ადგილობრივ და მსოფლიო ბაზარზე”.

ნოდარ ჩხარტიშვილის თქმით, საქართველოში საუკუნეების განმავლობაში 500-ზე მეტი ვაზის ჯიში ჩამოყალიბდა. აქედან დღეს საგურამოს საკოლექციო ნაკვეთში აღდგენილია 430-მდე ჯიში.

ნოდარ ჩხარტიშვილმა ასევე ისაუბრა იმაზე, თუ როგორ შეეწირა საბჭოთა პერიოდში მაღალმოსავლიანობაზე გათვლილ მრეწველობას ხარისხიანი, მაგრამ დაბალმოსავლიანი ჯიშები. როგორ განადგურდა საქართველოს დამოუკიდებლობის წლებში (განსაკუთრებით ბოლო წლებში) მეხილეობის, მევენახებისა და მეღვინეობის ინსტიტუტში საცდელი საკოლექციო ნაკვეთები. მხცოვანი მეცნიერის ლექცია ღვინის კლუბში საკმაოდ დიდხანს, სამი საათის განმავლობაში გაგრძელდა და ვაზის ქართულ ჯიშებთან დაკავშირებული მრავალი საჭირბოროტო საკითხი მოიცვა.

©ღვინის კლუბი/vinoge.com